Персеидите ќе го осветлат ноќното небо над Турција

Љубителите на астрономијата низ Турција и северната хемисфера се подготвуваат да го набљудуваат врвот на годишниот метеорскиот дожд Персеиди во текот на ноќта од денес кон утре, користејќи ги исклучително поволните услови на темно небо создадени од младата Месечина, јавува Анадолу.

Персеидите настануваат кога Земјата минува низ остатоците што ги остава кометата Свифт-Татл. Ситните честички со голема брзина согоруваат во атмосферата, создавајќи светли траги познати како ѕвезди што паѓаат.

Во Турција, астрономите очекуваат најдобри услови за набљудување од 2 часот по полноќ (23 часот по Гринич) до изгрејсонце утре.

На набљудувачите им се советува да се оддалечат од градските светла и да изберат места со отворен хоризонт. Не е потребна посебна опрема.

Во идеални услови, за време на максимумот може да се видат до околу 100 Персеиди на час, иако реалниот број зависи од временските услови, светлосното загадување и условите за набљудување.

Научно-истражувачкиот совет на Турција (ТУБИТАК), исто така, од 12 до 15 август го организира 28. настан за набљудување на небото кај езерото Емре во западната област Афјонкарахисар. Стотици посетители се собраа во регионот за телескопски набљудувања предводени од експерти и специјализирано набљудување на Персеидите.

Персеидите остануваат активни до крајот на август, но ноќта меѓу 12 и 13 август е главниот период за набљудување оваа година.

Врвот на метеорскиот дожд се совпаѓа со уште еден значаен астрономски настан денес – целосното затемнување на Сонцето.