Уганда се наметнува како потенцијален миграциски центар за земјите од ЕУ

Уганда се наметнува како потенцијален миграциски центар за земјите од Европската Унија, со очекувања дека во 2027 година би можела да биде домаќин на првиот центар за нерегуларни мигранти префрлени од Европа, објави денес грчкиот дневен весник „Катимерини“, јавува Анадолу.

Повикувајќи се на дипломатски извори, весникот наведе дека разговорите со Уганда се во напредна фаза, во рамките на иницијатива предводена од Германија, Австрија, Холандија, Данска и Грција.

„Предлогот се заснова на идејата дека многу мигранти би избрале доброволно да се вратат во земјите на потекло наместо да останат во Уганда“, нагласи весникот.

Центарот во источноафриканската земја првично би функционирал како пилот-програма и би можел да прими до 10.000 мигранти чии барања за азил веќе биле одбиени во земјите од ЕУ во кои првично пристигнале, според весникот.

Технички тимови се очекува да отпатуваат во Африка пред крајот на месецот за завршни разговори, објави весникот, додавајќи дека Руанда останува главна алтернативна опција, додека Кенија, која исто така била разгледувана, се чини дека е исклучена.

Министрите за миграција на петте земји треба да се состанат во Копенхаген на 4 септември за да го разгледаат напредокот во преговорите.