Шестмина цивили загинаа во Русија, двајца во Украина во текот на размената на воздушни напади меѓу Москва и Киев

Шест лица загинаа, а четири се повредени во украински ракетен напад врз село во руската Белгородска Област, додека две лица загинаа, а три се повредени во руски напади во украинската Запорошка Област, соопштија регионалните власти денес, пренесува Анадолу.

Вршителот на должноста гувернер на Белгородската Област, Александар Шуваев, изјави дека украинските сили го гранатирале селото Колосково во општинскиот округ Валујски.

„Шест цивили загинаа, а четири лица се повредени, меѓу кои и едно дете“, соопшти Шуваев на руската дигитална платформа и апликација за пораки Макс.

Тој додаде дека на две од повредените лица им била укажана медицинска помош, но тие одбиле хоспитализација, а другите, вклучително и детето, биле пренесени во локална болница.

Во Украина, гувернерот на Запорошката Област, Иван Федоров, на Телеграм објави дека две лица загинале, а три биле повредени во текот на ноќните напади врз Запорошката Област.

Според него, руските сили извршиле 1.217 напади врз 60 населени места во областа во период од 24 часа.

Најновите наводи не може независно да бидат потврдени.