Папата Лав XIV повторно повика на прекин на насилството врз Палестинците на окупираниот Западен Брег

Папата Лав XIV вчера повторно повика на прекин на насилството врз Палестинците на окупираниот Западен Брег и ја повика меѓународната заедница да ги интензивира напорите за решение со две држави, јавува Анадолу.

Говорејќи по неделната молитва „Ангелус“, папата Лав XIV повика на прекин „на повторените акти на насилство врз палестинското население на Западниот Брег“, објави „Ватикан њуз“.

Тој упати и итен апел до меѓународната заедница „да обезбеди напредок кон решение за две држави, за праведен и траен мир“.

Ватикан конзистентно застапува став дека решението за две држави, засновано врз безбедни и меѓународно признати граници, претставува единствен остварлив и праведен пат кон траен мир меѓу Палестина и Израел.

Папата го одбележа и почетокот на Медитеранските игри во јужниот италијански град Таранто, изразувајќи надеж дека спортскиот настан ќе послужи како „пророчки знак на мир и братство меѓу народите од овој регион и од целиот свет“.

На натпреварувањето учествуваат спортисти од земји во Африка, Азија и Европа што излегуваат на Средоземното Море.