Тројца Палестинци од исто семејство убиени во израелски напад со дрон во јужна Газа

Тројца Палестинци од исто семејство беа убиени денес во израелски напад со дрон во Ал-Карара, северно од Кан Јунис, во јужниот дел на Појасот Газа, соопштија медицински и локални извори, јавува Анадолу.

Медицински извор од болницата „Насер“ за Анадолу изјави дека телата на тројцата Палестинци биле донесени во установата по израелскиот напад во близина на крстосницата Ал-Матахин во Ал-Карара.

Сведоци и локални извори за Анадолу изјавија дека жртвите биле двајца браќа и нивниот братучед од семејството Абдин.

Израелски дрон ги погодил додека се наоѓале пред нивниот дом, при што сите тројца биле убиени, велат изворите.

Во централниот дел на Газа, еден Палестинец бил полесно повреден од огнот од израелско воено возило источно од Деир ал-Балах, според медицински извор од болницата „Ал-Акса“.

Израелските воени возила отвориле и силен оган јужно од Кан Јунис, додека израелските воени бродови отвориле оган кон крајбрежјето на градот. Нема пријавено повредени.

Нападите се случија и покрај повикот на американскиот претседател Доналд Трамп Израел да ги запре нападите врз Појасот Газа.

Во интервју за американската телевизија „Фокс њуз“ на 17 август, Трамп рече дека Израел „не треба да врши напади во Газа“.

Тој, исто така, рече дека Хамас се согласил да се разоружа во рамки на неговиот план за ставање крај на војната во енклавата.

Договорот за прекин на огнот е во сила од 10 октомври 2025 година, но израелските прекршувања од тогаш резултираа со смрт на 1.303 Палестинци и ранување на уште 4.336, додека стотици тела се извлечени од урнатините.

Од октомври 2023 година, Израел уби околу 73.438 Палестинци и повреди 174.447 во Појасот Газа, според Министерството за здравство на енклавата.