Околу 370 палестински деца се наоѓаат во израелските затвори

Околу 370 палестински деца се наоѓаат во израелските затвори, а најголем дел од нив се во затворите „Мегидо“ и „Офер“, се наведува во новиот извештај на Палестинскиот центар за застапување на правата на затворениците, јавува Анадолу.

Децата се меѓу над 9.400 палестински затвореници и притвореници што Израел ги држи во притвор на почетокот на август, соопшти организацијата за заштита на човековите права.

Се наведува дека притворањето палестински деца од страна на Израел повеќе не е ограничено на изолирани случаи, туку станува повторлива карактеристика на кампањите за приведување низ окупираниот Западен Брег и Источен Ерусалим.

Израелските сили привеле 276 палестински деца само во текот на првите шест месеци од оваа година, се додава од организацијата.

Организацијата, исто така, го привлече вниманието на континуираната употреба на административен притвор од страна на Израел, што овозможува Палестинците да бидат држени без обвинение или судење за периоди што можат да се продолжуваат врз основа на необјавени докази.

Палестинските и меѓународните организации за заштита на човековите права постојано ги обвинуваат израелските власти дека затворениците, меѓу кои и малолетниците, се изложени на тешки услови и дека им е оневозможен пристап до соодветна храна и медицинска грижа.