Shtresa e akullit e Grenlandës tkurret për të 30-in vit radhazi

Shtresa e madhe e akullit e Grenlandës u tkurr për të 30-in vit radhazi, transmeton Anadolu.

Siç raporton transmetuesi KNR, Shërbimi Gjeologjik i Danimarkës dhe Grenlandës (GEUS) njoftoi se shtresa e akullit, e cila mbulon rreth 80 për qind të sipërfaqes së Grenlandës, u tkurr për të 30-in vit radhazi.

Sipas raportimeve, shtresa e akullit është tkurrur që nga periudha 1995-1996, ndaj fenomeni nuk konsiderohet një luhatje afatshkurtër.

GEUS e përshkroi fenomenin si një “sinjal klimatik”.

Studiuesja e GEUS-it, Signe Hillerup Larsen, tha se 30 vitet e njëpasnjëshme të shkrirjes “nuk janë aspak një befasi”, por theksoi nevojën për të ndjekur zhvillimet.

“Kjo është e rëndësishme sepse shkrirja e shtresës së akullit kontribuon në rritjen e nivelit global të deteve. Sa më shumë akull të shkrihet nga shtresa e akullit, aq më shumë rritet niveli i deteve”, shpjegoi ajo.

KNR raportoi se sezoni i shkrirjes në Grenlandë përfundon në gusht, ndërsa humbja e masës së akullit llogaritet nga shtatori deri në gusht. Sipas raportimeve, shtresa e akullit humbi gjithsej rreth 173 miliardë tonë akull gjatë vitit të kaluar.

“Duke parë tendencat e përgjithshme të klimës dhe faktin se temperaturat do të vazhdojnë të rriten, presim që akulli të vazhdojë të shkrihet edhe për shumë vite”, tha Larsen.