“Kosova synon statusin kandidat në BE”

Kryenegociatori i Republikës së Kosovës me Bashkimin Evropian (BE), Jeton Zulfaj, ka marrë pjesë në mëngjesin e punës për Ballkanin Perëndimor, në kuadër të Forumit Strategjik të Bledit në Slloveni, transmeton Anadolu.

Përmes rrjeteve sociale, Zulfaj ka bërë të ditur se takimi është organizuar nga ministri i Punëve të Jashtme dhe Evropiane i Sllovenisë, Tone Kajzer, ku kanë marrë pjesë edhe ministrat e punëve të jashtme dhe të integrimit evropian të vendeve të rajonit.

“Diskutuam për procesin e anëtarësimit të rajonit në Bashkimin Evropian, bashkëpunimin rajonal dhe çështjet me interes të përbashkët për rajonin. Theksova prioritetin tonë për marrjen e statusit të vendit kandidat dhe hapjen e negociatave për anëtarësim në Bashkimin Evropian”, shkroi Zulfja.

Ai tha se Republika e Kosovës ka dëshmuar avancim në demokraci, fuqizim të sundimit të ligjit dhe zhvillim ekonomik, është plotësisht e linjëzuar me Politikën e Përbashkët të Jashtme dhe të Sigurisë të BE-së dhe mbetet e palëkundur në përkushtimin ndaj vlerave evropiane të mishëruara në nenin 2 të Traktatit për Bashkimin Evropian.

“Avancimi i Kosovës drejt anëtarësimit në BE është në interes të BE-së dhe të rajonit. Do të bashkëpunojmë me Slloveninë për të avancuar anëtarësimin tonë në BE”, përfundoi Zulfaj.

Edicioni i 21-të i Forumit Strategjik të Bledit në Slloveni, mblodhi bashkë liderë politikë, diplomatë, përfaqësues të institucioneve ndërkombëtare, ekspertë, akademikë dhe përfaqësues të komunitetit të biznesit.

Tema e këtij edicioni është “Fuqia për të formësuar të ardhmen”, me diskutime të cilat do të përqendrohen në ndryshimet gjeopolitike, të ardhmen e Evropës, sigurinë, bashkëpunimin ndërkombëtar, zhvillimet teknologjike dhe sfidat globale.