Esra Tekin
10 Август 2026•Ажурирано: 10 Август 2026
Турскиот претседател Реџеп Таип Ердоган го пречека австрискиот канцелар Кристијан Штокер со официјална церемонија во Претседателскиот комплекс во главниот град на Турција, Анкара, јавува Анадолу.
На церемонијата присуствуваа турскиот министер за надворешни работи Хакан Фидан, директорот за комуникации Бурханетин Дуран, главниот советник на претседателот Акиф Чагатај Килич и други официјални лица.
Штокер престојува во официјална посета на Турција на покана на претседателот Ердоган.
За време на средбите во рамките на неговата посета ќе бидат разгледани повеќедимензионалните односи меѓу двете земји, како и чекорите за натамошно развивање на постојната соработка.
Се очекува на разговорите да бидат опфатени и регионални и глобални прашања.
Односите меѓу Турција и Австрија во последно време покажуваат знаци на обновен ангажман, при што двете страни настојуваат да ја продлабочат соработката во областа на трговијата, миграцијата и безбедноста.
Турскиот министер за надворешни работи Хакан Фидан ја посети Виена во април, каде што се сретна со неговата австриска колешка Беате Мајнл-Рајзингер, како и со Штокер, при што беа истакнати напорите за зајакнување на билатералните односи, а беа разгледани и односите меѓу Турција и ЕУ и регионалните конфликти.
Економските врски остануваат еден од главните столбови на односите.
Билатералната трговија во 2025 година достигна околу 4,36 милијарди долари, што е зголемување од 3,91 милијарда долари во 2024 година, според Министерството за надворешни работи на Турција; според податоците на австриската Влада, трговската размена во 2025 година изнесувала речиси 4,3 милијарди евра.
Австрија е исто така значаен инвеститор во Турција.
Односите ги обликуваат и големата турска заедница во Австрија и значајните туристички врски.
Во 2025 година Турција ја посетиле повеќе од 563.000 австриски туристи, додека австриските инвестиции во Турција во периодот од 2005 до 2025 година надминале 11,2 милијарди долари.
