Холандија „длабоко жали“ поради одлуката на Израел да го укине статусот на холандските дипломати во Рамала

Холандија денес ја опиша како „непотребна“ одлуката на Израел да го укине статусот на холандските дипломати во Рамала, изразувајќи „длабоко жалење“ поради овој потег, објави јавниот радиодифузен сервис НОС, пренесува Анадолу.

Холандскиот министер за надворешни работи Том Берендсен рече дека Владата го разгледува својот одговор, откако израелскиот министер за надворешни работи Гидеон Саар соопшти дека холандските дипломати во Рамала, на окупираниот Западен Брег, имаат седум дена да ја напуштат земјата.

Саар образложи дека одлуката е донесена како одговор на мерките што Холандија ги презела против Израел.

Холандската Влада минатата недела воведе забрана за увоз на стоки со потекло од нелегалните израелски населби на окупираните палестински територии.

Берендсен рече дека мерката „не е насочена против Израел“ и дека Холандија има „обврска според меѓународното право да не придонесува кон незаконска состојба: нелегалните населби“.

„Во моментов ја разгледуваме ситуацијата“, рече Берендсен, додавајќи дека „нашите дипломати, се разбира, во моментов се клучен приоритет“.

Насилството од страна на доселениците врз Палестинците на окупираните територии се зголемува со години.