Berk Kutay Gökmen
24 Август 2026•Ажурирано: 24 Август 2026
Американскиот претседател Доналд Трамп денес изјави дека Иран „целосно се распаѓа“, во услови на тековните непријателства меѓу Вашингтон и Техеран, јавува Анадолу.
„Иран целосно се распаѓа!!! Претседател ДЏТ“, напиша Трамп на својата платформа „Трут сошал“, без дополнително образложение, повторувајќи ги своите претходни изјави во врска со економската и воената состојба на Техеран.
Вчера, министерот за финансии Скот Бесент изјави дека Соединетите Американски Држави влегуваат во „економски Ден Д“ против Иран, по она што тој го опиша како демонтирање на воените и нуклеарните капацитети на Исламската Република од страна на администрацијата на Трамп.
„Претседателот (Доналд) Трамп ги демонтираше воените капацитети на Иран, уништи речиси 100 отсто од неговите воени фабрики и ја закопа неговата нуклеарна програма“, напиша Бесент во објава на американската платформа за социјални медиуми Х.
Трамп во петокот изјави дека сè уште верува оти Иран не е подготвен да постигне „вистински договор“ со Вашингтон, додека се применуваат сè построги економски мерки против Техеран.
„Тие многу би сакале да постигнат договор, но според мое мислење, не се подготвени да го постигнат правилниот договор“, изјави Трамп за новинарите.
„Тие немаат пари, немаат морнарица, немаат воздухопловни сили, не им плаќаат на своите војници, не ѝ плаќаат на својата полиција. Имаат инфлација од 350 отсто“, додаде тој.
Трамп, исто така, сугерираше дека САД имаат „целосна контрола“ врз регионот околу Ормускиот Теснец, вклучително и врз клучниот воден пат и околното копнено подрачје во јужен Иран.
Вашингтон и Техеран во јуни потпишаа Меморандум за разбирање, со кој се повикува на прекин на непријателствата и обновување на пловидбата низ Теснецот. Но, договорот подоцна пропадна поради споровите околу условите за неговото спроведување и иднината на пловидбата низ овој воден пат.
Конфликтот започна кон крајот на февруари со американско-израелски напад врз Иран. Техеран одговори со напади врз цели во Израел и американски воени бази во регионот.
