Трамп воведе царини до 100 отсто за увезени беспилотни летала и компоненти

Американскиот претседател Доналд Трамп вчера потпиша проглас со кој се воведуваат царини до 100 отсто за увезени беспилотни летала и нивни компоненти, повикувајќи се на загриженоста за националната безбедност и синџирите на снабдување, јавува Анадолу.

Белата куќа во соопштение наведе дека царина од 100 отсто според вредноста на производот ќе се применува за дронови што се сметаат за особено чувствителни од аспект на националната безбедност, вклучително и оние што тежат повеќе од 25 килограми или се опремени со уреди за термално снимање, како и нивните станици за полнење/приклучување и одредени клучни компоненти.

Помалите беспилотни летала без одредени чувствителни можности и други компоненти ќе подлежат на царина од 25 отсто.

Беспилотните летала и компонентите од Европската Унија, Јапонија, Лихтенштајн, Јужна Кореја, Швајцарија и Тајван ќе подлежат на царина од 15 отсто, а увозот од Велика Британија што ги исполнува условите ќе биде предмет на стапка од 10 отсто, под услов значителен дел од хардверот, софтверот и технологијата да потекнуваат од тие земји и од САД.

Повеќето царини ќе стапат на сила 21 ден по потпишувањето на прогласот, а царините за компонентите што не се сметаат за особено чувствителни ќе стапат на сила по 180 дена.

Белата куќа соопшти дека мерките имаат цел да го зголемат домашното производство на беспилотни летала и да ја намалат зависноста од странски извори за клучните компоненти.