САД бараат сопственички удел во нафтените ресурси на Венецуела

Администрацијата на претседателот Доналд Трамп преговара со привремената влада на Венецуела за да обезбеди сопственички удел во нафтените ресурси на јужноамериканската земја, објави вчера американски медиум, повикувајќи се на двајца американски официјални претставници, пренесува Анадолу.

Преговорите опфаќаат повеќе од десетина продуктивни нафтени полиња со околу 90 милијарди барели докажани резерви, а не целокупните проценети 300 милијарди барели докажани нафтени резерви на Венецуела, објави веб-страницата „Аксиос“.

Според „Аксиос“, потенцијалниот „историски“ договор би можел да ги удвои американските нафтени резерви со тоа што на Вашингтон би му овозможил пристап до околу 300 милијарди барели резерви на Венецуела. „Да се каже дека овој договор е огромен би било потценување. Тој е колосален“, изјави еден од официјалните претставници за медиумот.

САД би добиле сопственички удел во нафтените полиња, додека приватни компании, вклучително и американски компании, би ги развивале полињата и би генерирале дополнителни приходи од нафтата за венецуелската влада.

Преговорите ги водат американскиот државен секретар Марко Рубио и вршителката на должноста претседател на Венецуела, Делси Родригез, а во нив е вклучен и заменик-началникот на кабинетот на Белата куќа, Стивен Милер, објави „Аксиос“.

Администрацијата настојува да нагласи дека договорот би бил во корист на венецуелскиот народ, додека постои загриженост дека Родригез би можела да биде обвинета дека ги отстапува природните ресурси на земјата на САД, пишува „Аксиос“.

Точниот рок за постигнување конечен договор засега не е познат. Се очекува американскиот секретар за енергетика Крис Рајт следната недела да отпатува во Венецуела за да разговара за начините на кои американските компании би можеле да го зголемат производството на нафта во земјата.

Потенцијалниот договор доаѓа во услови на нарушување на глобалното снабдување со нафта поради војните во Иран и Украина, што придонесе за повисоки цени. Стратегиските резерви на нафта на САД, исто така, паднаа на најниско ниво во последните четири децении.

Венецуела ги поседува најголемите докажани нафтени резерви во светот, но нејзината нафтена индустрија со години трпи поради недоволни инвестиции, лошо управување и пад на производството.

Администрацијата на Трамп зголемувањето на пристапот на САД до венецуелската нафта го постави како клучен елемент на својата поширока енергетска и надворешна политика кон западната хемисфера.

Администрацијата соопшти дека има цел „да ја обезбеди енергетската иднина на западната хемисфера за идните генерации“, истовремено ублажувајќи ги ценовните притисоци предизвикани од војната во Иран.

Најновите разговори се надоврзуваат на пошироките напори на Вашингтон за обновување на нафтениот сектор на Венецуела по американското апсење на претседателот Николас Мадуро во јануари.

Администрацијата оттогаш ја поддржа привремената влада предводена од Родригез, истовремено заложувајќи се за поголемо учество на САД во енергетската индустрија на земјата.