Повеќе од 50 деца починаа во епидемија на дифтерија во Северозападна Нигерија

Повеќе од 50 деца починаа како последица на епидемија на дифтерија во локалната самоуправа Рано, во северозападната нигериска сојузна држава Кано, изјави денес пратеник од таа сојузна држава, повикувајќи ги властите да ги засилат напорите за сузбивање на болеста, јавува Анадолу.

Ибрахим Малами, кој ја претставува изборната единица Рано во Собранието на сојузната држава Кано, предупреди на ситуацијата, наведувајќи дека епидемијата сериозно ги погодила заедниците во реонот Рурум, вклучително и Рурум А, Рурум Б и Сабувар Каура.

Тој рече дека медицинскиот оддел во Рано презел итни мерки, а неговиот Кабинет обезбедил лекови.

Малами ги повика гувернерот на Кано, Аба Кабир Јусуф, и државните здравствени власти да пратат дополнителен медицински персонал, лекови и друга итна помош во погодените заедници.

„Сакаме да ги информираме гувернерот и комесарот за здравство да пратат дополнителна итна помош во регионот бидејќи болеста во голема мера се прошири во таа област“, изјави Малами.

Пратеникот Усман Абубакар Тасиу, кој ја претставува изборната единица Киру, предупреди дека епидемијата се проширила и надвор од Рано, при што случаи се регистрирани и во заедниците Кванар Дангора, Гарин Дангора и Јелва, во соседната локална самоуправа Киру.

Потоа Собранието на сојузната држава усвои резолуција со која се бара итна владина интервенција и ја задолжи својата Комисија за здравство да координира со Министерството за здравство на сојузната држава за да се обезбеди спроведување итни мерки во погодените подрачја.

Дифтеријата е многу заразна бактериска инфекција што може да предизвика тешка болест и смрт, особено кај невакцинираните деца. Нигерискиот центар за контрола и превенција на болести ги советува родителите да обезбедат децата да ги примат препорачаните три дози од петвалентната вакцина, која штити од дифтерија, на возраст од 6, 10 и 14 недели.

Во последните години Нигерија се соочува со повторливи епидемии на дифтерија, при што Кано е меѓу најпогодените сојузни држави. Светската здравствена организација соопшти дека во Кано имало најголем дел од сомнителните случаи за време на големата епидемија на национално ниво во 2023 година.

Најновите смртни случаи ги истакнуваат тековните предизвици поврзани со опфатот со вакцинација, следењето на болеста и пристапот до навремено лекување, додека нигериските власти работат на сузбивање на епидемиите на дифтерија.