ОН издвојуваат 160 милиони долари за 12 најмалку финансирани хуманитарни кризи во светот

Обединетите нации (ОН) издвоија 160 милиони долари од својот Централен фонд за итни случаи (ЦЕРФ) за поддршка и животоспасувачка помош во 12 од најнедоволно финансираните хуманитарни кризи во светот, јавува Анадолу.

Оваа распределба е дел од пошироките напори да се стигне до 87 милиони луѓе што се соочуваат со најтешки хуманитарни потреби оваа година, истакна Канцеларијата на ОН за координација на хуманитарни прашања (OCHA).

„Треба да стигнеме до 87 милиони луѓе и немаме време за губење“, изјави шефот на ОН за хуманитарни прашања, Том Флечер.

Флечер нагласи дека нема да биде доволно само ова финансирање, повикувајќи ги лидерите да „покажат политичка волја за овозможување пристап, отстранување на пречките и помош за да стигнеме до луѓето чии животи се загрозени“.

Од овие средства, 150 милиони долари ќе бидат наменети за Авганистан, Буркина Фасо, Камерун, Чад, Куба, Мали, Нигер, окупираните палестински територии, Сомалија, Јужен Судан, Судан и Јемен.

Авганистан, окупираните палестински територии, Јужен Судан, Судан и Јемен, исто така, се меѓу десетте кризи за кои Флечер повика на итна дипломатска акција за обезбедување хуманитарен пристап.

Дополнителни 10 милиони долари ќе бидат наменети за задоволување на потребите на лицата со попреченост во рамките на овие 12 кризи.

Со оваа најнова распределба вкупниот износ на средства од Централниот фонд за итни случаи обезбедени досега во 2026 година достигна 483 милиони долари.