Британска и американска нафтена компанија ја одложија спорната тест-сондажа во Гренланд

Британската компанија „80 Мајл“ и нејзиниот американски партнер „Гренланд Енерџи“, за која се тврди дека е поврзана со американскиот претседател Доналд Трамп, ја одложија планираната тест-сондажа на источниот брег на Гренланд, објави вчера гренландскиот јавен радиодифузер КНР, пренесува Анадолу.

По консултациите со властите на Гренланд задолжени за минералните ресурси и „Гренланд Енерџи“, „80 Мајл“ соопшти дека сондажата во Нунап Кеча ќе биде одложена за следната година.

Од „Гренланд Енерџи“, исто така, соопштија дека биле информирани од Владата на Гренланд оти распоредот треба да биде сменет.

Двете компании планираат заеднички да ги обезбедат потребните дозволи до зимата 2027 година.

Наводно, тие се обврзале да направат адаптирања за иднината преку зајакнување на односите со локалната заедница, стратегиските партнери и релевантните власти.

Исто така, тие ќе обезбедат дополнителни информации за временската рамка на проектот за сондажа откако процесот ќе биде подобро разјаснет.

Неодамна Одделот за индустрија и минерали на Гренланд издаде предупредување до „Гренланд Енерџи“, компанија со седиште во Тексас, основана минатата година и за која се тврди дека е поврзана со Трамп, откако опремата за сондажа била донесена на брегот без потребните владини одобренија.

„Ќе биде упатено силно предупредување до носителот на лиценцата“, соопшти одделот.

Контроверзијата се појави во услови на обновен интерес на САД за Гренланд. Неколку дена откако жителите пријавија дека опремата за сондажа била донесена на брегот, Трамп објави слика генерирана со вештачка интелигенција на својата платформа Truth Social, на која е прикажан како гледа кон гренландско село со натпис „Здраво, Гренланд!“

Трамп предизвика меѓународни критики во јануари 2025 година откако одби да ја исклучи можноста за употреба на воена сила за преземање контрола врз Гренланд, наведувајќи дека на САД им е потребен островот „од причини на националната безбедност“.