Три лица загинаа при пад на мал авион во Швајцарија

Три лица загинаа при пад на мал авион во швајцарскиот алпски кантон Вале, објави денес швајцарскиот јавен сервис „Свисинфо“, јавува Анадолу.

Кантоналната полиција на Вале вчера соопшти дека во вторникот попладне загинале тројцата што се наоѓале во малиот авион.

Малиот едномоторен авион „Циррус СР22T“, кој полетал од градот Лугано во кантонот Тичино, според извештаите, се урнал во близина на општината Лојкербад во кантонот Вале, откако удрил во падина.

Итните служби веднаш пристигнале на местото на несреќата со три хеликоптери и двајца специјалисти за спасување, но можеле само да констатираат смрт на трите лица.

Вчера идентитетите на жртвите сè уште се утврдувале.

Отворена е истрага за утврдување на причините за несреќата.

Во текот на изминатата деценија во Швајцарија биле регистрирани девет воздухопловни несреќи со три или повеќе жртви, не сметајќи го случајот во Лојкербад.