Burak Bir
14 Септември 2026•Ажурирано: 14 Септември 2026
Висок офицер на шпанската морнарица беше суспендиран, а подоцна и отстранет од воената база на НАТО во Велика Британија откако неговата врска со жена запознаена преку апликацијата за запознавање „Тиндер“ предизвика безбедносни сомненија дали таа шпионира за Русија, пренесува Анадолу.
Високиот офицер на шпанската морнарица бил во врска со Јанина Вајт, жена со двојно државјанство (британско и полско) родена во Советскиот Сојуз, во периодот кога таа била обвинета дека е агент на Кремљ, објави весникот „Телеграф“.
Пред да биде отстранет од базата и вратен во Шпанија во 2025 година, шпанскиот офицер бил стациониран во Командата на сојузничките поморски сили (МАРЦОМ) во седиштето во Нортвуд, Хартфордшир. Оваа команда ги надгледува руските подморници и воени бродови што патролираат во британските води и ги следи танкерите за нафта под санкции што припаѓаат на руската „флота од сенка“.
Персоналот на базата подоцна ја поништил пропусницата за пристап на офицерот на НАТО, а командантот на базата му забранил влез во објектот додека траела истрагата на разузнавачките служби.
Вајт (49), која живее во Ромфорд, источен Лондон, ги негирала обвинувањата за шпионажа и тврдела дека е неправедна жртва на дискриминација поради нејзиното руско потекло, додавајќи дека повеќе не е во врска со шпанскиот поморски командант.
„Дефинитивно знам дека не сум руски шпион“, изјави таа за британскиот весник.
Вајт изјави: „Знаев дека тој се занимава со руската ‘флота од сенка’ и со подморниците. Но постоеше строга забрана за дискутирање какви било детали за тоа дома.“
Нејзината врска со шпанскиот офицер започнала во октомври 2024 година преку апликацијата „Тиндер“, кратко откако таа се разделила со својот поранешен сопруг, истакнат локален функционер што претходно ја има посетено резиденцијата на британскиот премиер на Даунинг стрит, се наведува во веста.
Според судските документи до кои дојде „Телеграф“, тој ја поканил на собир во просториите за офицери и подофицери во Нортвуд на 12 декември 2024 година, обезбедувајќи ѝ еднодневна пропусница за посета на воената база со придружба.
„Беше поведена безбедносна истрага од страна на НАТО, како и шпанска безбедносна истрага. Обединетото Кралство не е вклучено во овие процеси, кои резултираа со одлука на Шпанија да му го суспендира националниот безбедносен сертификат [на офицерот]“, се наведува во судскиот документ.
