Иран: Евентуална нова војна со САД би можела да се прошири до Индискиот Океан

Евентуална нова војна со САД би можела да се прошири дури до Индискиот Океан доколку Иран биде повторно нападнат, предупреди денес висок ирански воен советник, пренесува Анадолу.

Генерал-мајор Јахја Рахим Сафави, висок советник на иранскиот врховен лидер за воени прашања, изјави дека вооружените сили на земјата подготвиле планови за низа сценарија, објави иранската новинска агенција Фарс.

„Не знаеме што им се случува во главите на (американскиот претседател) Трамп и (израелскиот премиер) Нетанјаху“, рече Сафави.

Тој рече дека иранските сили се подготвиле за најлоши сценарија во случај на дополнителни американски или израелски напади врз објекти или националните интереси на земјата. Во таков случај, предупреди тој, конфликтот би се проширил.

„Сега кога војната се прошири од Персискиот Залив и Ормускиот Теснец до Црвеното Море, можно е во следната фаза на евентуална војна со САД овој фронт дополнително да се прошири, до Индискиот Океан или на друго место“, рече тој.