Во Куала Лумпур вчера започна 22. Меѓународен халал-саем на Малезија (МИХАС 2026), јавува Анадолу.
На настанот под мотото „Градење доверба, поттикнување отпорност“ се собраа компании, купувачи и претставници на индустријата од целиот свет.
Четиридневниот настан, чиј домаќин е малезиското Министерство за инвестиции, трговија и индустрија, а го организира Малезиската корпорација за развој на надворешната трговија (МАТРАДЕ), се одржува во Малезискиот меѓународен трговски и изложбен центар до сабота.
Се очекува саемот да привлече околу 50.000 посетители од 45 земји, а учествуваат 1.700 компании со околу 2.000 изложбени штандови.
Организаторите очекуваат преку изложбата и програмата за деловно поврзување да бидат остварени вкупни продажби во вредност од 5 милијарди малезиски рингити (1,23 милијарди долари).
Во исламската практика халал се однесува на она што е дозволено според исламскиот закон. Во трговијата, терминот не ги опфаќа само храната и пијалаците, туку и начинот на кој производите се набавуваат, произведуваат, ракуваат и транспортираат, како и сè поголем број услуги.
Претседателот на МАТРАДЕ, Ризал Мерикан Наина Мерикан, во разговорот со новинарите на настанот го истакна растечкиот опсег на глобалната халал-индустрија, наведувајќи дека таа сега ги опфаќа не само поединечните производи, туку и целокупните синџири на снабдување.
Тој рече дека халал-стандардите ги опфаќаат состојките, амбалажата, логистиката и транспортот, при што спречувањето вкрстена контаминација низ целиот синџир на снабдување е важен дел од одржувањето на усогласеноста со халал-стандардите.
Ризал посочи дека халал-практиките се применуваат и во земји со мал број муслиманско население, што според него е показател за меѓународниот досег на индустријата, наведувајќи ја како пример новозеландската сточарска и месна индустрија.
„Халал-индустријата навистина се шири експоненцијално“, рече тој.
Тој оцени дека Турција има „огромна можност“ во глобалната халал-индустрија.
Одговарајќи на прашањето на дописникот на Анадолу за улогата на Турција во проширувањето на глобалниот халал-пазар, Ризал ги истакна геополитичката позиција на земјата, нејзиното меѓународно влијание, индустрискиот капацитет и технолошкиот напредок.
„Турција е толку голема и значајна земја, а потоа, се разбира, како политички дел од НАТО, имате влијание и на двете страни, на Западот и на Истокот“, рече тој.
Осврнувајќи се на конфликтот во Палестина, Ризал рече дека Турција е „еден од главните актери“ во ова прашање.
„Затоа сметам дека Турција има огромна можност да одигра една од водечките улоги во халал-индустријата поради капацитетот што го има и добрата волја во која ужива во очите и срцата на светското население, особено на муслиманското население“, рече тој.
„И, што е уште поважно, тие имаат и технолошки напредок“, додаде тој.
МИХАС 2026 опфаќа 14 сектори од халал-економијата, од храна и пијалаци до фармацевтски производи, козметика и производи за лична нега, скромна мода, халал-логистика, исламски финансии, технологија, услуги и туризам приспособен за муслимани.
На настанот првпат е воведен и систем со вештачка интелигенција, наменет да им обезбеди на регистрираните учесници персонализирана поддршка при пронаоѓање деловни можности, вмрежување, навигација низ изложбата и управување со состаноци.
Меѓународната програма за набавки на МИХАС, главна иницијатива за деловно поврзување, се очекува да овозможи околу 4.000 состаноци меѓу 450 меѓународни купувачи, меѓу кои 50 премиум-купувачи и околу 600 малезиски извозници.
Саемот ги опфаќа и Центарот на знаење, павилјонот „Жени во извозот“, наградите МИХАС и програмата „Поканет купувач“.
Иницијативата „Жени во извозот“ е проширена од самостоен форум во посебен павилјон со 80 изложувачи, од кои 60 се од Малезија, а 20 се меѓународни учесници.
На МИХАС 2026 ќе бидат претставени и ревии на скромна мода и демонстрации во живо на кулинарски вештини, при што во текот на четирите дена во МИХАС Кичен ќе учествуваат 32 готвачи.
МИХААС, првпат организиран во 2004 година, прерасна во меѓународна платформа што ги поврзува бизнисите од различни сегменти на халал-економијата.
news_share_descriptionsubscription_contact
contact_the_ombudsman
is_there_an_error_in_this_story
