ИОМ: Речиси 16.000 лица раселени во Јемен за една недела

Речиси 16.000 лица биле новораселени во Јемен во текот на првата недела од ноември, соопшти денес Меѓународната организација за миграции (ИОМ), јавува Анадолу.

„И натаму сме многу загрижени поради ситуацијата во Јемен, која брзо се менува“, изјави портпаролката на ИОМ, Зои Бренан, пред новинарите во Женева.

Осврнувајќи се на најновите податоци на организацијата за следење на раселувањето, кои го опфаќаат периодот од 1 до 7 ноември, Бренан рече дека движењето на населението продолжува со значителен интензитет.

„За само една недела забележавме речиси 16.000 новораселени лица“, рече таа.

Според организацијата, со најновите податоци вкупниот број лица што биле раселени најмалку еднаш во 2026 година надминува 343.000.

Јемен е зафатен од конфликт од 2014 година, кога бунтовниците Хуси ја презедоа контролата врз главниот град Сана и други делови од земјата.