Јаков Милатовиќ: Младиќ беше осуден за геноцид, Црна Гора мора да биде општество кое ги почитува пресудите

Црна Гора мора да биде општество кое ги почитува пресудите на меѓународните судови, јасно ги осудува воените злосторства, го чува достоинството на жртвите и нивните семејства и го отфрла секое величење и релативизирање на воените злосторства, порача денес претседателот на државата Јаков Милатовиќ по повод смртта на осудениот воен злосторник Ратко Младиќ, пренесува Анадолу.

„Односот кон семејството на починатиот не може да биде изговор за релативизирање на воените злосторства“, наведе Милатовиќ во соопштение.

„Ратко Младиќ е правосилно осуден за геноцидот во Сребреница, како и за други најтешки воени злосторства извршени за време на војната во Босна и Херцеговина. Тоа не е прашање на политички став, туку факт утврден со правосилна пресуда на меѓународен суд и, како таков, не смее да биде предмет на политичко релативизирање“, заклучи Милатовиќ.

Младиќ, поранешен командант на Главниот штаб на Армијата на Република Српска, беше правосилно осуден на доживотен затвор пред Хашкиот трибунал за геноцидот во Сребреница, како и за други воени злосторства извршени за време на војната во Босна и Херцеговина.

За геноцид, прогон, истребување, убиства и присилно преместување на несрпското население, како и за злосторства за време на опсадата на Сараево и земањето припадници на ОН како заложници, тој беше осуден во 2017 година, а правосилноста на пресудата беше потврдена во 2021 година.

Од правдата се криеше 16 години, а беше уапсен во Србија во 2011 година.