سەرکۆماری ئێران پزیشکیان: "چاکسازی لە سیستمی ئیداری وڵاتدا كارێكی پێویسته‌"

سەرکۆماری ئێران، مەسعود پزیشکیان ئاماژەی بەوە كرد بە سیستمێکی ئیداری هێواش و عەقڵییەتی داخراو ناگه‌نه‌ ئامانجەکان و، ئەنجامدانی چاکسازی لە سیستمی ئیداری و ئیدارەدانی وڵات كارێكی پێویسته‌.

بەپێی ڕاگەیاندراوی سەرۆکایەتی کۆماری ئێران، پزیشکیان لە کۆبوونەوەیەکدا لەگەڵ کۆمەڵێک شارەزا و خۆبەخشی بواری کشتوکاڵ هەڵسەنگاندنی بۆ دۆخی ئێستای ئێران کرد.

پزیشکیان باسی له‌وه‌ كرد ئێران جگه لەو کێشەکانی جەنگ دروستیکردوون، ڕووبەڕووی ناهاوسەنگیی جیاواز و زەحمەتییەکانی کەشوهەوا بووەتەوە، بەتایبەت کەمی سەرچاوەکانی ئاو، جەختیشی لەسه‌ر ئه‌وە کردەوە پێویستە سیاسەتەکانی بەرهەمهێنان و گەشەپێدان بە شێوازێک ئامادە و جێبەجێ بكرێن کە لەگەڵ ڕاستییەکانی ئێستادا بگونجێن.

گوتیشی: "بە سیستمێکی ئیداری هێواش و عەقڵییەتی داخراو ناگەینە ئامانجەکانمان. بەردەوامبوونی ئەم پرۆسەیە هیچ ئەنجامێکی نابێت جگه لە بەفیڕۆدانی کات و سەرچاوەکان".