Laura Gamba Fadul
12 nëntor 2025•Përditësim: 12 nëntor 2025
Dhjetëra protestues indigjenë me shkopinj gome shkelën perimetrin e sigurisë dhe hynë me forcë për pak kohë në vendin ku mbahej konferenca e 30-të vjetore e OKB-së për ndryshimet klimatike (COP30) në Belem të Brazilit, duke çuar në përplasje me personelin e sigurisë së OKB-së, transmeton Anadolu.
Kërkesat kryesore të protestuesve u përqendruan në të drejtat e tokës, drejtësinë ekonomike dhe kundërshtimin ndaj zgjerimit të karburanteve fosile. Ata mbanin flamuj dhe postera me slogane si "Toka jonë nuk është në shitje" dhe "Nuk mund të hamë para... Duam që tokat tona të jenë të lira nga agrobiznesi, eksplorimi i naftës, minatorët e paligjshëm dhe prerësit e paligjshëm të pyjeve".
Grupi brohoriti me kërkesat për të "taksuar miliarderët" për rolin e tyre në krijimin e "nxehtësisë" që përkeqëson krizën klimatike. Presidenti i Brazilit, Luiz Inacio Lula da Silva u shënjestrua gjithashtu me brohoritje lidhur me eksplorimin e naftës në grykëderdhjen e lumit Amazon.
"Qeveria Lula, turp për ty, po e shkatërron klimën me këtë shpim", brohoritën protestuesit.
Ekipi i sigurisë i OKB-së përfundimisht i dëboi protestuesit nga zona, por jo para se të ndodhte një përleshje pranë hyrjes, të cilën personeli i sigurisë e bllokoi shpejt me tavolina.
Mediat lokale raportuan se të paktën dy anëtarë të stafit të sigurisë u plagosën në përleshje. Një roje pësoi prerje në ballë pasi u godit nga një daulle ose shkop daulleje dhe një tjetër thuhet se u godit në kokë. Personeli i sigurisë konfiskoi disa shkopinj që mbanin protestuesit.
Pak rajone e ndiejnë ndikimin e ndryshimeve klimatike në shëndet aq sa Amazona, ku ndodhet Belemi. Në vitin 2024, rajoni u godit nga një thatësirë historike, e përkeqësuar nga zjarre të shumta.
