Vritet një ushtar iranian në sulmet e fundit të SHBA-së

Një pjesëtar i Marinës iraniane u vra në sulmet e fundit amerikane në provincën Khuzestan, në jugperëndim të Iranit, transmeton Anadolu.

Agjencia shtetërore e lajmeve IRNA e identifikoi ushtarakun si Amirhossein Salimzadeh. Ai u vra më 1 shtator, ndërsa ishte në detyrë gjatë sulmeve amerikane në Khuzestan, njoftoi agjencia.

"Të paktën 18 persona u vranë dhe 142 të tjerë u plagosën në sulmet e fundit ajrore amerikane", tha sot zëdhënësi i Ministrisë së Shëndetësisë së Iranit, Hossein Kermanpour.

Kermanpour tha se viktimat u regjistruan nga mbrëmja e 30 gushtit deri më 2 shtator.

Sipas raportimeve, katër persona u vranë në Sirik, shtatë në Khuzestan, katër pjesëtarë të Forcave Ajrore Hapësinore të Gardës Revolucionare Islamike të Iranit (IRGC) në Kermanshah dhe tre pjesëtarë të Basij-it në ishullin Lavan ndërsa të paktën 50 persona u plagosën në një ceremoni dasme në Sirik.

Përshkallëzimi i fundit nisi pas një sulmi amerikan ndaj ishullit Larak të dielën, i cili i dha fund një periudhe njëmujore qetësie në përleshjet rajonale.

Washingtoni tha se forcat amerikane kishin shënjestruar dy raketahedhës iranianë, pasi kishin vërejtur përgatitje për vendosjen e raketave që transportonin mina detare.

Garda Revolucionare Islamike e Iranit (IRGC) u kundërpërgjigj duke sulmuar objektet ushtarake amerikane në vendet fqinje, përfshirë Kuvajtin, Emiratet e Bashkuara Arabe, Jordaninë, Bahreinin dhe Irakun.

Më pas, Komanda Qendrore e SHBA-së ndërmori sulme të reja ajrore kundër objektivave të IRGC-së brenda Iranit të martën në mbrëmje.

Përleshjet e rinovuara pasojnë dështimin e një memorandumi mirëkuptimi të 18 qershorit, që synonte t’i jepte fund armiqësive dhe të rihapte Ngushticën e Hormuzit. Përleshjet rifilluan në korrik për shkak të mosmarrëveshjeve lidhur me zbatimin e tij.