Kurti: Duhet një dakordim sa më i shpejtë midis partive

PRISHTINË (AA) – Kryeministri në detyrë i Kosovës, njëherësh kryetar i Lëvizjes Vetëvendosje (LVV), Albin Kurti, ka bërë thirrje për qasje pozitive dhe konstruktive nga partitë politike në mënyrë që të përmbyllet formimi i institucioneve të vendit, raporton Anadolu.

Kurti, në një deklarim për media pasi Albulena Haxhiu u zgjodh kryetare e Kuvendit të Kosovës, tha se për miratimin e propozimeve për nënkryetarë të Kuvendit nevojitet edhe mbështetja e shumicës parlamentare, dhe për këtë duhet të gjendet një dakordim sa më shpejt midis partive.

Kurti tha se aktualisht është në kontakt me kryetarin e Lidhjes Demokratike të Kosovës dhe po ashtu i ka shkruar edhe kryetarit të Partisë Demokratike të Kosovës.

“Le të jemi pozitivë e konstruktivë dhe në këtë mënyrë të kemi Kuvend të konstituar, shpejt Qeveri të formuar dhe të kalojmë tek zgjedhja e presidentit që duhet të bëhet në mënyrë që t’i evitojmë zgjedhjet e reja”, tha Kurti.

- “Deklarata e deputetit serb në Kuvend ishte në shpërputhje me Kushtetutën e Kosovës”

Duke komentuar deklaratën e përfaqësuesit të Listës Serbe, Slavko Simiq, lidhur me propozimin për nënkryetar të Kuvendit, Kurti tha se ajo ishte në kundërshtim me Kushtetutën e Kosovës dhe me betimin e deputetit.

Sipas Kurtit, propozimi i dorëzuar me shkrim për Simiqin si kandidat për nënkryetar është në përputhje me Kushtetutën, ndërsa deklarimi i bërë në seancën e Kuvendit ishte në “shpërputhje flagrante” me të.

“Vetëm ai propozim i cili është dërguar me shkrim është në përputhje me Kushtetutën”, deklaroi Kurti.

Kurti komentoi edhe një deklaratë të bërë nga një përfaqësues i grupit parlamentar, i cili kishte ndërlidhur qëndrimin e Simiqit me varrimin e Ratko Mlladiqit.

Ai e përmendi Mlladiqin si përgjegjës për masakrën e Srebrenicës dhe kritikoi mënyrën se si ai është nderuar nga Serbia dhe Kisha Ortodokse Serbe.