Admir Fazlagikj,Besar Ademi
17 qershor 2018•Përditësim: 18 qershor 2018
SHKUP (AA) – Para Kuvendit të Maqedonisë është protestuar kundër Marrëveshjes për zgjidhjen e kontestit maqedono-grek për emrin dhe për partneritet strategjik, sipas të cilës Maqedonia do ta ndryshojë emrin e saj në Republikën e Maqedonisë së Veriut, raporton Anadolu Agency (AA).
Qindra protestues të tubuar para godinës së Shtëpisë Ligjvënëse shprehën revoltën e tyre kundër ndryshimit të emrit, duke brohoritur me sloganet “Maqedonia” dhe “Nuk e japim emrin”.
Ata me gurë dhe mjete piroteknike sulmuan kordonin policor që ruante godinën e Kuvendit, pas së cilës forcat policore u përgjigjën me lot gazsjellës dhe arritën të shpërndajnë protestuesit.
Aktualisht situata është e qetë, ndërsa informata për të lënduar deri më tani nuk janë zbuluar.
Sot në anën greke të liqenit të Prespës, shefat e diplomacisë së Maqedonisë dhe Greqisë, Nikolla Dimitrov dhe Nikos Kotzias nënshkruan Marrëveshjen për zgjidhjen e kontestit maqedono-grek për emrit dhe për partneritet strategjik, në prani të kryeministrave të të dy vendeve, Zoran Zaev dhe Alexis Tsipras.
Në ceremoninë e nënshkrimit të marrëveshjes morën pjesë përfaqësues të lartë të Bashkimit Evropian (BE) dhe Kombeve të Bashkuara (OKB). Të dy kryeministrat e quajtën njëri-tjetrin miq, duke vlerësuar marrëveshjen si një ditë historike.
