Турскиот гигант АСЕЛСАН потпиша договори од 2,75 милијарди долари за хибридни системи за противвоздушна одбрана

Турската одбранбена компанија АСЕЛСАН потпиша договори во вредност од 2,75 милијарди долари со турскиот Секретаријат за одбранбена индустрија за набавка на хибридни системи за противвоздушна одбрана, соопшти денес компанијата, пренесува Анадолу.

Во соопштението до Платформата за јавно известување (KAP), АСЕЛСАН наведе дека договорите ќе имаат позитивно влијание врз приходите на компанијата.

Компанијата го наведе 5 октомври како очекуван датум за почеток на новата деловна соработка.

Според последните објавени финансиски извештаи, Секретаријатот за одбранбена индустрија учествувал со 30,6 отсто во нето-продажбата на АСЕЛСАН и со 37,8 отсто во нејзините побарувања од купувачи.

АСЕЛСАН не објави распоред за испорака ниту дополнителни детали за системите опфатени во договорите.

Извршниот директор Ахмет Акјол на турската платформа за социјални медиуми „НСосијал“ истакна дека тековните активности за сериско производство дополнително го зајакнуваат турскиот систем за противвоздушна одбрана „Челична купола“ и ја подобруваат заштитата на воздушниот простор на земјата.

Опишувајќи ја Турција како една од ретките земји способни да развиваат сопствени системи за противвоздушна одбрана, Акјол вети дека ќе продолжи да работи „дење и ноќе“ кон постигнување независна одбранбена индустрија.