Претседателот на УЕФА вели дека нема да се кандидира против претседателот на ФИФА, но го повика да се повлече

Претседателот на УЕФА, Александар Чеферин, изјави дека нема да се кандидира против претседателот на ФИФА, Џани Инфантино, но предупреди дека Инфантино би можел да се соочи со противкандидат доколку се кандидира за реизбор во март, jaвува Анадолу.

Инфантино се соочува со растечки притисок откако се откажа од планот за продажба на удели во Светското првенство на инвеститори од приватниот капитал. УЕФА и другите конфедерации се спротивставија на предлогот, при што УЕФА се закани и со бојкот на натпреварувањата на ФИФА.

Чеферин го критикуваше планот во интервју за поткастот „Останатото е политика: Лидерство“, нарекувајќи го „уште полош од планот за Суперлигата“.

„Апсолутно сум сигурен дека планот на [ФФЕ] е мртов. За мене, најважно е што запревме уште еден обид за продажба на спортот“, рече тој.

Чеферин изјави дека Инфантино сега има две опции: да се повлече откако ја загубил поддршката од фудбалската заедница или да се кандидира на изборите и да се соочи со противкандидат.

„Една опција е да сфати дека нема поддршка и тоа не е само политичката поддршка на оние што гласаат, туку политичката поддршка на фудбалската заедница, политичката поддршка на навивачите, политичката поддршка на играчите, поранешните играчи и тренерите. А втората опција е да оди на изборите во март, но во тој случај мислам дека ќе има кандидат против него. Сè уште не знам кој.“

Инфантино ја предводи ФИФА од 2016 година и се сметаше дека веројатно ќе освои нов мандат без противкандидат во Мароко следната година. ФИФА го одреди 18 ноември како краен рок за номинација на противкандидати.

Чеферин (58) се споменуваше како потенцијален противкандидат, но ја отфрли можноста да се кандидира за претседател на ФИФА, наведувајќи дека останува посветен на УЕФА.

„Не сум заинтересиран од две причини. Една причина е што ја сакам УЕФА и сакам да работам тука и мислам дека во одреден момент… време е малку и да уживаш во животот. А втората причина е што мојот кредибилитет е многу, многу поголем ако не сум заинтересиран за таа позиција.“

На прашањето дали Инфантино станал премногу близок со американскиот претседател Доналд Трамп, со кого воспоставил блиски односи пред неодамнешното Светско првенство, Чеферин одговори:

„Искрено, мислам дека сте наивни ако мислите дека политичар како него, или кој било политичар, е ваш добар пријател. Во моментот кога ќе станете проблем, престанувате да бидете пријател на политичар.“