Шефицата на дипломатијата на ЕУ повика на повеќе воени бродови за заштита на комерцијалниот транспорт во Црвеното Море

Шефицата за надворешна политика на Европската Унија (ЕУ), Каја Калас, ги повика земјите членки да распоредат дополнителни воени бродови за да помогнат во заштитата на комерцијалниот бродски сообраќај во Црвеното Море, јавува Анадолу.

Земјите од ЕУ спроведуваат патроли во Црвеното Море од 2024 година во рамките на операцијата „Аспидес“, додека зголемените закани од јеменската група Хуси продолжуваат да го нарушуваат бродскиот сообраќај низ теснецот Баб ел-Мандеб.

„На операцијата ѝ се потребни повеќе поморски и воздушни средства за да се справи со зголеменото ниво на закани во регионот“, им рече Калас на новинарите во Њујорк по состанокот на министрите за надворешни работи на ЕУ, одржан на маргините на Генералното собрание на ОН.

„Црното Море, Ормускиот Теснец и Баб ел-Мандеб се три критични поморски теснеци чие нарушување има последици многу пошироки од регионот“, рече таа.

Операцијата во моментов главно се потпира на три воени бродови од Италија и Грција, додека други земји членки на ЕУ обезбедуваат повремена поддршка, објави „Блумберг“. Сепак, досега земјите од ЕУ покажаа мал интерес за зголемување на бројот на бродови вклучени во операцијата или за промена на нејзините цели.

„Кога беше воспоставена операцијата 'Аспидес', индикацијата беше дека се потребни најмалку 10 бродови“, рече Калас. „Мислам дека ситуацијата сега е уште посериозна.“