Швајцарската асоцијација на градови повика на национален одговор за адаптација на климатските промени

Швајцарската асоцијација на градови повика на национален одговор за адаптација кон климатските промени и топлотните бранови што произлегуваат од нив, објави вчера „Свисинфо“, пренесува Анадолу.

„Приспособувањето кон климатските промени е задача на целото општество. Ние, градовите, ќе можеме да се справиме со тоа само со соработка со кантоните и сојузната Влада“, изјави претседателот на Швајцарската асоцијација на градови, Ханспетер Хилфикер, во интервју за „Зонтагсблик“, пренесе „Свисинфо“.

Според „Свисинфо“, градовите веќе се свесни за климатските промени и презеле повеќе мерки, но сè уште им се потребни структуриран финансиски механизам и национална координација за утврдување на приоритетите.

Хилфикер предложи отстранување на поплочувањето од јавните простори, зголемување на зеленилото во урбаните средини и реновирање на училишните згради како мерки што би им помогнале на градовите да се приспособат на зголемените температури.

Тој, исто така, повика на поставување системи за климатизација во одредени затворени простори, како што се болниците и училиштата, но нагласи дека таквите системи се „само еден мал дел од сложувалката“ од мерките потребни за градовите да останат погодни за живеење за време на топлотните бранови.