Трамп и Си ќе ја посетат Националната архива на последниот ден од државната посета на кинескиот лидер на САД

Американскиот претседател Доналд Трамп и кинескиот претседател Си Ѓинпинг треба да ја посетат Националната архива во Вашингтон, на последниот ден од државната посета на кинескиот лидер на САД, јавува Анадолу.

Трамп и првата дама Меланија Трамп треба да бидат домаќини на Си и неговата сопруга Пенг Лијуан во Белата куќа на чај, по што двата брачни пара ќе се упатат кон Националната архива, каде што се чуваат документи што ја прикажуваат историјата на САД.

Си од средата е во тридневна државна посета на САД – негова втора посета од ваков карактер од 2015 година.

Трамп и Си вчера разговараа и присуствуваа на државна вечера. Трамп рече дека двете земји „никогаш не се согласувале подобро“, истовремено признавајќи дека „претставуваат различни системи“.

Си рече дека лидерите воделе „искрени и продлабочени разговори“ и постигнале заедничко разбирање за повеќе прашања, додавајќи дека разговорите обезбедиле „ново стратегиско насочување“ за односите меѓу Кина и САД.

Денес се очекува да биде објавена и заедничка изјава за резултатите од разговорите меѓу лидерите на најголемите економии во светот.

Пред разговорите со Си, Трамп рече дека одлуките донесени во Вашингтон „можат да промовираат мир и просперитет во децениите што следуваат“.

Посетата на Си следува по државната посета на Трамп на Кина во мај, кога двајцата лидери се согласија да се стремат кон „конструктивни кинеско-американски односи засновани на стратегиска стабилност“.

Си е единствениот кинески лидер што остварил две државни посети на САД откако двете земји воспоставија дипломатски односи во 1979 година.