Şahin Demir
14 Септември 2026•Ажурирано: 14 Септември 2026
Сателитските снимки покажуваат големи оштетувања на складиштето за гориво на „Сауди Арамко“ и очигледни оштетувања на воен објект во јужниот дел на Саудиска Арабија по последните напади од јеменските Хуси, според анализите на платформата за сателитски снимки „Соар“, јавува Анадолу.
Сателитските снимки од постројката за складирање гориво на „Сауди Арамко“ во Абха покажуваат најмалку шест резервоари што целосно се уништени, а на осум е предизвикано оштетувања од различен степен, се наведува во анализата.
Објектот, кој претставува главен центар за дистрибуција на гориво за југозападна Саудиска Арабија, изгледа главно е надвор од функција, соопшти „Соар“.
Сателитските снимки од 13 септември покажуваат две траги од горење на воен плато-простор во Шарурах, во јужната провинција Наџран.
Оваа област се користи за паркирање на оклопни транспортери и воени пикап-возила, што укажува на тоа дека локацијата можеби била цел на напад од страна на Хусите, според „Соар“.
Анализите се засноваат врз модифицирани сателитски податоци од програмата „Коперникус Сентинел“. Саудиските власти не дадоа детална процена на штетата прикажана на снимките.
Овие наоди доаѓаат во време на нагла ескалација на тензиите меѓу Саудиска Арабија и јеменските Хуси, кои во последните денови извршија серија ракетни напади и напади со беспилотни летала врз кралството.
На 8 септември ракетните напади и нападите со беспилотни летала на Хусите беа насочени кон Абха, Хамис Мушаит, Џазан и Наџран, при што беа повредени 73 цивили, вклучително и жени и деца, според саудиските власти.
Саудиското Министерство за енергетика соопшти дека нападите предизвикале пожари во енергетски објекти на југот на кралството и привремено се запрени некои од операциите на целните локации.
Хусите продолжија со нападите, при што вчера изјавија дека извршиле голема операција со ракети и беспилотни летала против саудиски воени цели, вклучително и објекти во Хамис Мушаит.
Саудиските власти, исто така, вчера издадоа итни предупредувања за можни закани во Абха и Хамис Мушаит, а подоцна објавија дека опасноста поминала.
Хусите тврдат дека нивните операции се одговор на саудиските воени напади врз Јемен, додека Ријад ги осуди нападите како кршење на суверенитетот и предупреди дека тие ги загрозуваат цивилите и клучната инфраструктура.
