Руската компанија за социјални медиуми ВК го тужи Епл поради отстранувањето на апликациите од Ап Стор

Руската компанија за социјални медиуми ВКонтакте (ВК) поднесе тужба против три субјекти на Епл поради отстранувањето на нејзините апликации од Ап Стор, објави денес руската државна новинска агенција ТАСС, повикувајќи се на компанијата и на евиденцијата на Московскиот арбитражен суд, пренесува Анадолу.

Компанијата со седиште во Санкт Петербург соопшти дека бара нејзините апликации да бидат вратени на Ап Стор, да им се обнови пристапот на корисниците до известувањата во апликациите, како и да бидат изречени казни доколку Епл не ја исполни судската одлука.

Во тужбата поднесена на 19 август како обвинети се наведени „Епл Рус“ ДОО, „Епл“ и „Епл дистрибушн интернешнал лимитед“.

Епл сè уште не даде коментар за тужбата.

Во јуни, ВК го обвини Епл дека без предупредување ги отстранил неговите апликации од Ап Стор, што предизвика остар одговор од Кремљ.

Компанијата ги опиша постапките на Епл како „неоправдани и неприфатливи“, додавајќи дека продолжува да работи во интерес на корисниците и ги презема сите неопходни чекори за да обезбеди континуиран пристап до своите производи и услуги.

Портпаролот на Кремљ, Дмитриј Песков, изјави дека отстранувањето на апликациите на ВК подига прашања за доверливоста на услугите на Епл и дека се очекува објаснување.

Тој рече дека одлуката на Епл не ги засега само Русите, туку и корисниците што зборуваат руски низ светот, советувајќи им на корисниците на ВК да преминат од Епл на Андроид.