Şeyma Erkul Dayanç, Medina Choreska
11 Ноември 2026•Ажурирано: 11 Ноември 2026
Родители во Финска започнаа кампања против она што го опишуваат како „нормализација на расистичкиот говор и симболи“ во општеството, објави денес телевизијата „Јле“, пренесува Анадолу.
Иницијативата започнала откако тројца родители на платформата „Линкдин“ споделиле загриженост поради промената на ставовите кон имигрантите и малцинските групи. Оттогаш, кампањата привлекла десетици членови.
Еден од родителите изјави дека сега постои „поголема слобода“ за користење расистички навреди, додавајќи дека таквиот говор станува сè позастапен на онлајн платформите што ги користат младите.
Друг родител изјави дека неговото осумгодишно дете било нападнато од двајца тинејџери додека се враќало со велосипед од училиште.
„Ваквите работи не треба да се пренесуваат на децата“, рече таа, додавајќи дека „расизмот во целина станува сè поприфатен во општеството“.
Истражувачите, исто така, предупредија дека реториката на екстремната десница може да допре до младите преку шеги, мемиња и иронија.
„Таквите изрази можат да направат дискриминаторските идеи да изгледаат вообичаено, прифатливо, па дури и забавно“, изјави истражувач од областа на социјалната психологија на Универзитетот во Хелсинки.
Финската Служба за безбедност и разузнавање предупреди дека платформите на социјалните мрежи се користат за влијание врз младите и нивно регрутирање.
Загриженоста доаѓа во време кога бројот на сомнителни кривични дела од омраза пријавени во полицијата достигнал рекордно ниво трета година по ред, според истражување на Полицискиот колеџ на Финска.
Истражување на Финскиот црвен крст, исто така, покажало дека 95 проценти од лицата на возраст од 15 до 24 години доживеале или биле сведоци на расизам на интернет или на социјалните мрежи.
Финското Министерство за внатрешни работи за „Јле“ соопштило дека полицијата активно ја следи ситуацијата и ја нагласило потребата од соработка со училиштата и родителите во справувањето со екстремистичките активности.
