Неколку танкери за нафта го сменија правецот на пловење во Црвеното Море по заканите од Хусите

Неколку танкери за нафта го сменија правецот на пловење или се вратија во Црвеното Море по заканите и нападите од јеменската група Хуси, покажаа податоците за следење на бродови денес, јавува Анадолу.

Вчера некои танкери ја сменија насоката на пловење за да го избегнат теснецот Баб ел-Мандаб, при што два се упатија на север кон Суецкиот Канал.

Овој потег следуваше по вртењето на бродовите „Ксин Лонг Јанг“ и „Родос“ во вторникот.

Танкерите го смениле правецот пред да стигнат до јужниот влез на Црвеното Море.

Меѓу другите пловила што го сменија правецот се и „Њу Чемпион“, „Ксин Тонг Јанг“, „Њу Прајм“ и „Деш Вират“, а се врати и бродот за превоз на возила „Лиу Џианг Коу“.

Во меѓувреме, „Ксин Лонг Јанг“ и „Коснев Лејк“ денес повторно се упатија кон Баб ел-Мандаб, со што потенцијално тестираа дали Хусите ќе ја спроведат најавената поморска блокада.

Хусите соопштија дека ги нападнале саудиските танкери „Енцелија“ и „Лајла“ со ракети и беспилотни летала.

„Енцелија“ прати повик за помош откако синоќа беше погоден од проектил што предизвика пожар на предниот дел. Соопштено е дека екипажот е безбеден, а наводниот напад врз „Лајла“ сè уште не е независно потврден.

Групата поддржана од Иран во понеделникот објави дека ќе воведе поморска блокада на Саудиска Арабија и ги предупреди компаниите за бродови да не работат на саудиските пристаништа.

Заканите предизвикаа загриженост за нови нарушувања кај Баб ел-Мандаб бидејќи пловидбата низ Ормускиот Теснец останува строго ограничена поради ширењето на конфликтот меѓу САД и Иран.