Rabia İclal Turan
08 Октомври 2026•Ажурирано: 08 Октомври 2026
Белата куќа побара од Пентагон да подготви опции за напади врз цели во Иран што би можеле да бидат изведени пред изборите за Конгресот на 3 ноември, објавија медиумите, пренесува Анадолу.
Запрашан за наводите, претставник на Пентагон за Анадолу изјави: „Работата на Министерството е да развива и да му презентира на претседателот воени опции.“
Претставникот ниту ги потврди ниту ги демантираше наводите.
„Атлантик“, повикувајќи се на двајца претставници на администрацијата, објави дека големината и целите на евентуалните напади – како и прашањето дали администрацијата на крајот ќе продолжи со нив – сè уште се разгледуваат.
Советниците на Трамп сметаат дека вистинскиот момент за нови напади би бил по изборите за Конгресот, а не пред нив, објави списанието.
Претставник на Белата куќа за „Атлантик“ изјави дека Трамп „ги има сите опции на располагање во секое време“, но не одговори на прашањата за времето на евентуалните напади.
Одделно, „Аксиос“ објави дека Пентагон пред неколку дена ѝ наредил на Централната команда на САД (ЦЕНТКОМ) да ги заврши подготовките за обновување на големите борбени операции во Иран, повикувајќи се на американски претставници.
Според наводите, директивата не содржела конкретен датум за започнување на нападите.
САД и Израел започнаа војна против Иран на 28 февруари. Техеран одговори со ракетни и напади со беспилотни летала низ регионот и практично го затвори Ормускиот Теснец, стратегиска рута за снабдување со енергенси.
Вашингтон и Техеран во јуни потпишаа Меморандум за разбирање по посредничките напори на Пакистан и Катар за запирање на непријателствата и создавање услови за преговори.
Спроведувањето на договорот оттогаш е во застој поради несогласувања, меѓу другото, околу безбедноста и пловидбата низ Ормускиот Теснец.
Трамп минатиот месец, во обраќањето пред Генералното собрание на ОН во Њујорк, рече дека очекува да постигне договор со Иран по изборите за Конгресот во САД, предупредувајќи дека се соочува со „голема одлука“ дали да се стреми кон договор или да ја „уништи“ земјата.
