Иран го поздрави „протерувањето“ на САД од Ирак, вели дека тоа е почеток на пошироко повлекување од регионот

Иранската исламска револуционерна гарда (ИРГЦ) денес го поздрави „протерувањето“ на САД од Ирак, оценувајќи дека овој потег го означува почетокот на пошироко американско повлекување од регионот, пренесува Анадолу.

Во соопштението по повод завршувањето на повлекувањето на САД од Ирак, ИРГЦ наведе дека случувањето е „предвесник на ослободувањето на Западна Азија од јаремот на доминацијата на Големиот Сатана“.

ИРГЦ соопшти дека заминувањето на САД од Ирак е резултат на „волјата на ирачкиот народ“, како и на „отпорот и дејствувањето на ирачката Влада“, опишувајќи го како „историска победа“.

Гардата го повика Вашингтон да го напушти регионот и „управувањето со безбедноста да им го препушти на народите на земјите во регионот“.

Во соопштението се наведува дека присуството на САД во Ирак „траело две децении“ и претставувало „прв чекор кон целосното протерување на американските сили“ од регионот.

Во средата американското Министерство за одбрана соопшти дека САД и нивните партнери во коалицијата „формално ја завршиле Операцијата ‘Непоколеблива решителност’ во Ирак“, додека повлекувањето на силите и опремата на коалицијата од воздухопловната база Ербил го означило завршувањето на воената мисија.

Главниот портпарол на Пентагон, Шон Парнел, рече дека 12-годишната кампања „ја поразила ИД како организирана воена закана во Ирак и низ регионот“.

Багдад и Вашингтон во септември 2024 година се договорија да ја завршат воената мисија на коалицијата во Ирак во согласност со распоредот што траеше до крајот на септември 2026 година, со премин кон билатерални безбедносни односи меѓу Ирак и земјите членки на коалицијата.

Коалицијата беше формирана под раководство на САД во 2014 година откако ДЕАШ зазеде големи делови од Ирак и Сирија, при што на ирачките сили им обезбедуваше воздушна, разузнавачка поддршка и поддршка со обука во операциите против групата.

Во декември 2017 година Ирак објави дека повторно воспоставил целосна контрола врз територијата што ја зазела ДЕАШ.

Американските сили првпат го нападнаа Ирак во 2003 година, со цел да го соборат Садам Хусеин, а се повлекоа кон крајот на 2011 година.