Бројот на жртви во пожарот во рускиот гасно-хемиски комплекс се искачи на седум лица

Бројот на загинати во пожарот што избувна во вторникот во Амурскиот гасно-хемиски комплекс на рускиот Далечен Исток се зголеми на седум лица, соопшти компанијата во средата, пренесува Анадолу.

Пожарот на градилиштето во близина на руско-кинеската граница е изгаснат, а согорувањето на преостанатите индустриски гасови во моментов се врши под надзор на специјалисти, соопшти компанијата во објавата на Телеграм.

Телата на четворица кинески работници биле пронајдени за време на операциите за пребарување и спасување, а потврдена е смрт на вкупно седум лица, од кои еден руски и шестмина кинески државјани, се наведува во соопштението.

„Судбината на уште деветмина кинески државјани... и натаму е непозната. Продолжуваат операциите за пребарување и спасување“, се наведува во соопштението и се додава дека 152 лица побарале медицинска помош.

Од нив, 36 лица биле хоспитализирани со повреди од различен степен, а специјален авион на руското Министерство за вонредни ситуации пристигнал за да пренесе дел од повредените во медицински установи, се додава во соопштението.

Експертите продолжуваат да го следат квалитетот на воздухот на периферијата на блискиот град Свободни, а не биле регистрирани надминувања на максимално дозволените концентрации на контролираните супстанции, соопшти компанијата.

Во вторникот компанијата соопшти дека, според прелиминарните информации, пожарот избувнал во помошен процесен оддел од единицата за пиролиза на објектот.

Истражниот комитет на Русија соопшти дека го истражува инцидентот поради сомнение за „прекршување на безбедносните барања“ и работи на утврдување на точната причина.

Комплексот, кој се претставува како „едно од најголемите претпријатија во светот за производство на полиетилен и полипропилен од брендови што се барани на рускиот и светскиот пазар“, е заеднички проект на руската петрохемиска компанија СИБУР и кинеската нафтена и гасна компанија Синопек, а сè уште не почнал со производство.