Tarek Chouiref
06 Октомври 2026•Ажурирано: 06 Октомври 2026
„Сиријан ерлајнс“ планира да ја удвои својата флота на 12 авиони и до крајот на 2026 година да опслужува 25 дестинации, додека националниот авиопревозник продолжува со широк план за проширување и модернизација, јавува Анадолу.
Авиокомпанијата вчера го претстави својот нов визуелен идентитет на Меѓународниот аеродром во Дамаск, каде што првиот авион со новиот дизајн на ознаките стапи во употреба, објави официјалната сириска новинска агенција САНА.
Анвар Акад, извршен директор на „Сиријан авиејшн холдинг компани“, изјави дека авиопревозникот ја започнал годината со девет дестинации, а оттогаш ги додал Амстердам, Виена, Копенхаген и Москва.
Тој рече дека наскоро ќе бидат објавени нови линии, при што авиокомпанијата има цел до крајот на годината да достигне 25 дестинации.
Авиопревозникот моментално оперира со шест авиони и планира да ја удвои флотата на 12 авиони во истиот период.
„Сиријан ерлајнс“ во август ги прими првите два од вкупно осум авиони од семејството „Ербас А320“, во рамки на програмата за обновување на флотата.
Авиокомпанијата, исто така, ги модернизира своите дигитални услуги, вклучително и системите за резервации, плаќања и платформи наменети за патниците. Акад изјави дека нов систем за резервации, усогласен со меѓународните стандарди, треба да биде пуштен во употреба на почетокот на ноември.
Новата веб-страница веќе е активна, додека се развиваат и мобилни услуги и услуги за самостојно користење.
Омар ал-Хосари, директор на Управата за цивилно воздухопловство и воздушен транспорт, изјави дека пошироката реформа има цел да го обнови сирискиот воздухопловен сектор, да ги подобри услугите за патниците и повторно да ги воспостави врските на земјата со меѓународните воздухопловни мрежи.
Сириските власти во ноември 2025 година потпишаа договор вреден 4 милијарди долари со меѓународен конзорциум за развој, проширување и управување со Меѓународниот аеродром во Дамаск. Договорот вклучува и финансирање од 250 милиони долари за набавка на авиони и поддршка на флотата на националниот авиопревозник.
