Германската партија АфД поднесе кривична пријава против канцеларот поради изјавите за „етничко чистење“

Германската партија АфД поднесе кривична пријава против канцеларот Фридрих Мерц поради неговата изјава дека миграциската политика на оваа екстремно десничарска партија претставува „етничко чистење“ на квалификуваната работна сила, објави денес весникот „Билд“, пренесува Анадолу.

Штефан Бранднер, секретар на пратеничката група на АфД, рече дека изјавите на Мерц се „од криминогена природа“ и „целосно неприфатливи“. Тој додаде дека пратеничката група „цврсто се придржува кон Уставот“.

Во својата прва јавна конфронтација со АфД по изненадувачката изборна победа во источната покраина Саксонија-Анхалт во неделата, Мерц за време на бурната парламентарна дебата рече дека екстремно десничарската партија би можела да урне еден од столбовите на германската економија преку расистичка кампања за масовна депортација.

„Терминот 'ремиграција' не е ништо друго освен синоним за етничко чистење врз основа на потекло и боја на кожата“, рече тој во средата, изјава проследена со аплауз од другите партии во Парламентот.

За екстремистите, терминот „ремиграција“ се однесува на масовно протерување на луѓе со имигрантско потекло. Германската служба за внатрешно разузнавање, Сојузната канцеларија за заштита на Уставот, ја дефинира ремиграцијата како концепт што „има цел да создаде етнички дефинирани општества и со тоа да ги протера сите 'странци'“.

Во својата изборна програма за Саксонија-Анхалт, АфД повика на политики за „ремиграција“, со цел да се забрзаат депортациите на барателите на азил чии барања биле одбиени и на странските државјани што сториле кривични дела.