Во Белгија регистрирани речиси 3.000 смртни случаи над очекуваното за време на топлотните бранови

Речиси 3.000 дополнителни смртни случаи биле регистрирани во Белгија за време на топлотните бранови ова лето, според ревидираните податоци објавени од белгискиот Институт за јавно здравје „Сиенсано“, јавува Анадолу.

Вториот и третиот топлотен бран во летото се поврзани со вкупно 900 дополнителни смртни случаи, со што вкупниот број дополнителни смртни случаи регистрирани за време на топлотните бранови ова лето достигна 2.935, според податоците на „Сиенсано“, кои денес ги пренесе јавниот радиодифузер на француски јазик РТБФ.

Во вториот топлотен бран, кој траеше од 4 до 17 јули, има 535 дополнителни смртни случаи, што одговара на стапка на прекумерна смртност од 14,8 отсто.

Фландрија забележа најголем број дополнителни смртни случаи - 310, потоа Валонија - 198 и Брисел - 42.

За време на третиот топлотен бран, кој траел од 28 јули до 16 август, „Сиенсано“ регистрирал 365 дополнителни смртни случаи, опишувајќи ја прекумерната смртност како „блага“.

Најсмртоносен ден во летото останува 27 јуни, кога биле регистрирани 641 смртен случај, што претставува стапка на прекумерна смртност од 146,5 отсто, според „Сиенсано“.

Институтот нагласи дека влијанието на екстремните горештини не било ограничено само на постари лица.

„Значителна прекумерна смртност е забележана и кај лица помлади од 65 години“, соопшти „Сиенсано“.

Високата смртност за време на топлотните бранови Институтот за јавно здравје ја припиша на повеќе фактори, вклучително времетраењето на екстремните горештини, зголемувањето на температурите и зголеменото загадување со озон.

Ова лето во Белгија имаше неколку периоди со исклучително високи температури, што повторно ја зголеми загриженоста за здравствените последици од продолжената изложеност на топлина.