ОпенАИ размислува за забавување на развојот на напредната вештачка интелигенција

Американската компанија за вештачка интелигенција ОпенАИ размислува за забавување на развојот на најсовремените модели, објави денес „Блумберг“, пренесува Анадолу.

Главниот извршен директор Сем Алтман на вработените за време на неодамнешен состанок им кажал дека компанијата потенцијално би можела да го ублажи своето темпо, според лица запознаени со ова прашање.

Алтман изразил надеж дека другите лаборатории за вештачка интелигенција ќе се координираат за слични мерки, иако забележал дека одредени конкуренти може да одбијат да се вклучат во таквата иницијатива.

Дискусиите се појавуваат откако вработените во водечките технолошки фирми алармираат за потенцијалните опасности од напредните автономни системи, зголемувајќи го надзорот низ целата индустрија.

ОпенАИ, креаторот на ЧетЏПТ, веќе забави делови од својот процес на развој на модели и ги запре специфичните внатрешни процеси на обука поради безбедносни причини. Компанијата одби да коментира за интерниот состанок, објави „Блумберг“.

Намерното забавување на развојот на напредната ВИ следува по консултациите меѓу раководството на ОпенАИ и владините претставници. Во јули Алтман откри дека бил на разговори со Белата куќа во врска со потребата од повнимателно темпо на напредокот на вештачката интелигенција.