Ставен под контрола пожарот во Лознани близу Битола

Центарот за управување со кризи (ЦУК) информираше дека пожарот кај селото Лознани во Општина Могила близу Битола е ставен под контрола, пренесува Анадолу.

Ситуацијата со справување со пожарите вчера била најтешка во Пелагонија каде што пожарот загрозил неколку села.

Директорот на Дирекцијата за заштита и спасување (ДЗС), Стојанче Ангелов, изјави дека ангажирал тим за брз одговор на ДЗС, составен од 20 припадници, кои брзо се распоредиле и помогнале во гаснењето.

„Има и едно повредено лице, најверојатно со изгореници на дланките. Тој е пренесен во болница“, рече Ангелов.

„Битката беше многу тешка и затоа апелирам до граѓаните да бидат многу внимателни“, додаде тој.

Ангелов истакна дека вчерашниот ден бил еден од најтешките ова лето за справување со многубројните пожари што избувнаа на територијата на земјата.

До 7:30 часот утрово се регистрирани вкупно 40 пожари на отворен простор, од кои активни се шест пожари, под контрола се три и изгаснати се 31 пожар, информираа од ЦУК.