Активни четири пожари во земјава, три се под контрола во последните 24 часа

Во последните 24 часа во земјава се регистрирани вкупно 25 пожари на отворен простор, од кои четири се активни, три се под контрола, а 18 се изгаснати, соопшти Центарот за управување со кризи (ЦУК), пренесува Анадолу.

Според ЦУК, активни пожари има на неколку локации во Студеничани, Македонски Брод, Велес и Зелениково.

Под контрола се пожарите кај селата Алданци и Норово и кај Борино и Житоше во Општина Крушево и на депонијата во Кратово.

Министерството за внатрешни работи (МВР) соопшти дека полициски службеници вчера уапсиле битолчанец за предизвикување пожар.

Од МВР посочуваат дека пожарот бил изгаснат од екипа на Територијалната противпожарна екипа од Битола, а нема повредени лица.

Екипа од СВР Битола извршила увид и по целосно документирање на случајот против приведениот ќе биде поднесена соодветна пријава.