İbrahim Atmaca
23 Berfanbar 2018•Rojanekirin: 23 Berfanbar 2018
CAKARTA
Hat ragihandin ku di tsunamiya ku li Tengava Sundayê ya Endonezyayê çêbû da hejmara miriyan derket 168an.
Berdevkê Ajansa Rêvebiriya Afatê ya Neteweyî (BNPB) Sutopo Purwo Nugroho diyar kir ku di tsunamiya ku li Tengava Sundayê ya dikeve navbera Sumatra û Grava Cavayê çêbû da hejmara miriyan derket 168an, hejmara birîndaran 745 e.
Nugroho diyar kir ku li herêmê 30 kes winda ne û got ku herî zêde meriv li herêma Pandeglangê mirin.
Nugroho destnîşan kir ku li herêma Banten û başûrê bajarê Lampungê ji ber tsunamiyê xesareke mezin çêbû.
Saziya Meteorolojî, Îqlim û Jeofîzîkê ya Endonezyayê (BMKG) jî hişyarî da gel ku nêzî qeraxên tengavê nebin.
Her wiha BMKGyê ragihand ku duh bi şev Çiyayê Agirîn ê Anak Krakatau (Zarokê Krakatau) teqiya û dibe ku piştî teqînê di bin avê da ax şiqitî be û ew jî bûbe sedema tsunamiyê.
Li herêmên ku tsunamiyê lê xist xebatên lêgerîn û xelaskirinê dewam dikin û ji ber ku tsunamiyê li gelek qadên turîstîk da, dibe ku hejmara miriyan zêde be.
Ji ber ku teqîna Çiyayê Agirîn ê Anak Krakatauyê zêde bû di meha îlonê da li herêmê elerim hatibû dayîn.
28ê îlonê da li Kendava Paluyê ya Grava Sulawesiyê bi lerza 7,5an erdhej çêbûbû û piştî erdhejê tsunamî çêbûbû û tê da ji 2 hezarî zêdetir kes miribûn, nêzî 1500î kes winda bûbûn.
Endonezya li ser xeta erdhej û agirîn a "Çembera Agir a Pasîfîkê" ye. Di 26ê berfanbara 2004an da li herêmê erd bi lerza 9,1ê hejiyabû, piştî erdhejê tsunamî rabibû û li tevahiya welatên herêmê 230 hezar kes miribûn.
